Күрмеулі мәселелер шешімін таппақ
Түс ауа есеп беруші топ ақша бұлтты Ақтан батыр мен Сыр бойылық ағайындарды Хиуа, Қоқан хандықтарының езгісіне және Ресей отаршылдарына қарсы ұлт-азаттық көтерілісінде қолбасшылық еткен Жанқожа бабаның есімі берілген қос ауылға бет алды.Есеппен танысқан әрбір ауыл тұрғындары көкейдегісін айту мүмкіндігін тиімді пайдаланды. Арықбалықтықтардың көптен көтеріп жүрген күрмеулі мәселесінің бірі - ауылдағы апаттық жағдайдағы білім ошағы еді. Бұл мәселені ауыл тұрғындары өткен жылғы кездесуде де көтерген. Қуанышқа орай "Жайлы мектеп" жобасы аясында бой көтерер құрылыстың тізіміне аталған ауылға 300 орындық білім ошағы да кірістірілмек.
Мұндағы екінші өзекті мәселе ауыл тұсында орналасқан "Ащы" көлден нәпақасын тауып жүрген ағайынның қолын байлап отырған меншік иесінің шектеулері болып отыр.
Бұл сауалға аудандық ауыл шаруашылық және жер қатынастары бөлімінің басшысы қажетті құжаттарды дайындап, мәселенің мән-жайын анықтайтынын айтты.
Одан бөлек, ауыл маңындағы қорым басына қоқыс төгіп қорлағандар мен қаңғыбас иттер көрсеткен кесел және мал біткеннің көршілес үй аулаларын ластауы сынды арыз-шағым, ұсыныс-пікірлер айтылды. Жоғарыда аталған шағымдар бойынша ауданның полиция бөлімі тиісті тапсырмаларын алды.
