Көмекпен қамтылған отбасылар газды төмен бағамен алады
Атаулы әлеуметтік көмек пен тұрғын үй көмегін алатын отбасыларға газды төмендетілген бағамен алу мүмкіндігі қарастырылған, деп хабарлайды Egemen.kz Ұлттық экономика министрлігіне сілтеме жасап.«Мемлекет басшысының газ бағасын белгілеу моделін жетілдіру бойынша тәсілдерді әзірлеу жөніндегі тапсырмасы аясында Табиғи монополияларды реттеу комитеті тұтынушылардың жеке тоғызыншы тобын бөлу бойынша жұмыс жүргізіп жатыр. Бұл санатқа «мемлекеттік атаулы әлеуметтік көмек пен тұрғын үй көмегін алатын тұрмыстық тұтынушылар кіреді. Бұл жұмыс қоғамдық маңызы бар нарықтарда баға белгілеу қағидаларына өзгерістер мен толықтырулар енгізу арқылы жүзеге асты», делінген ведомство хабарламасында.
Биылғы жылдың 1 сәуірінен бастап пилоттық жоба аясында Тараз және Орал қалаларында жоғарыда аталған топтың азаматтары тауарлық газды 20 %-ға төмендетілген бағамен алып жатыр. Ал, бұл 3 мыңнан астам тұтынушыны қамтиды.
«1 шілдеден бастап мемлекеттік атаулы әлеуметтік көмек пен тұрғын үй көмегін алатын тұтынушылар санатына жататын отбасылардың елдің барлық газдандырылған өңірінде төмендетілген бағамен газ алу мүмкіндігі болады. Газға төмендетілген бағаны алу үшін тұтынушы Egov.kz. порталындағы АӘК және тұрғын үй көмегін алушы ретіндегі өзінің мәртебесіне көз жеткізуі қажет», деп қосты министрлік.
