Ораза кезінде суға шомылған дұрыс па?
– Шомылу немесе душ қабылдау, сондай-ақ әтір және басқа да иіссуларды қолдану оразаны бұза ма? Сауалға Қазақстан мұсылмандары діни басқармасының Өскемен аймағы бойынша бас имамы, облыстық «Халифа Алтай» мешітінің бас имамы Ермек қажы Мұқатай жауап береді:– Душ қабылдау, шомылу немесе жүзу оразаны бұзбайды. Себебі ораза ұстаған адамға суға түсуге тыйым салынбаған. Бірақ суға түскен адам аузын шайған кезде су жұтып қоймауы шарт. Мұхаммед пайғамбарымыздың (с.ғ.с.) ораза ұстап жүрген кезде суға түсіп, ғұсыл алғаны туралы деректер бар. Әтір, иіссуларды пайдалану, олардың хош иісін иіскеу Ханафи мәзһабы бойынша оразаны бұзбайды және оразаға ешқандай жағымсыз әсер етпейді. Сонымен қатар хош иісті өсімдіктер иісін, мысалы, раушангүл мен раушан майын иіскегенде ораза бұзылмайды.
