Үкімет алдағы үш жылда қайтадан Ұлттық қорға "қол салады"
Бүгін Мәжілісте "Ұлттық қордың 2022-2024 жылдарға арналған кепілдендірілген трансферт туралы" Заң жобасы қаралды. Оған сәйкес алдағы үш жылда Ұлттық қордан 6,6 триллион теңге бөлінбек, деп хабарлайды Express Qazaqstan.
Ұлттық қордан республикалық бюджетке берілетін кепілдендірілген трансферт мөлшері:
2022 жылы — 2,4 триллион теңге;
2023 жылы — 2,2 триллион теңге;
2024 жылы — 2 триллион теңге.
Бұл ақшаны ортақ зейнетақы және мемлекет базалық зейнетақы төлемдеріне бағыттау ұсынылады,—деді Ұлттық экономика министрі Әсет Ерғалиев.
Оның айтуынша, Ұлттық қордан алынатын ақшаның басты мақсаты — елімізде әлеуметтік дамуды қамтамасыз етіп, инфрақұрылым жобаларын іске асыру.
Зейнетақы төлеу — мемлекеттің әлеуметтік жауапкершілігі. Ел бюджетінің тең жартысы осы әлеуметтік салаға жұмсалады. Оның көп бөлігі осы зейнетақы мен жәрдемақыларға кетеді. Мысалы зейнетақы төлеуге 2,4 триллион теңге бөлінеді,—деді министр.
