Білім ордасы бой көтереді
Қазіргі таңда ауданда апаттық жағдайда тұрған мектеп жоқ деп мақтанышпен айтуға болады. Күн өткен сайын білім ошағына оң аяқпен аттаған оқушылар саны артып келеді. Соған сай жауаптылар жаңа мектептер тұрғызу жайы күн тәртібінен түсірен емес. Жақында Әйтеке би кентінде, бұрынғы №170 мектептің орынына жаңа мектептің құрылысы басталды.250 балаға арналған мектеп ғимаратының жобасын әзірлеу үшін былтыр жергілікті бюджеттен қомақты қаржы бөлініп, көп ұзамай жоба оң қорытынды алған. Құрылысты толық аяқтау үшін миллиардқа жуық қаржы жұмсалады деп жоспарланып отыр. 12 айға созылатын қызу жұмыс облыстық құрылыс, сәулет және қала құрылысы басқармасы тарапынан «Жұмыспен қамтудың жол картасы» шеңберінде қаржыландыруға ұсынылған.
Құрылыс жұмыстарын бастау үшін ұлттық қордан 471,779 миллион теңге бөлінді. Нысанның жер учаскесі 1,08 гектарды құрайды. Жобада сыртқы әжетхана, автономды бу қазандығы, қоқыс контейнерлері, 50 кубтық септик, жеке трансформатор қондырғысы, ДЭС, ШРП, алаңдары мен автотұрақ қаралған.
Бұдан бөлек, оқушылар үшін линейкада тұру және баскетбол алаңы салынады. Жас ерекшелігіне сай 1-9 сыныптарға арналған гимнастика бөлмесі, бастауыш сынып балаларына бөлек ойын залдары қарастырылған.
Р.ҚАЙРАТҰЛЫ
