Денсаулық сақтау министрлігінің мәліметінше, өткен тәулікте 5 179 адамнан коронавирус анықталған. Осылайша, елімізде COVID-19 вирусын жұқтырғандар саны 504 290-ға жетті. Өткен тәулікте 2 529 адам коронавирустан айықты. Пандемия басталғалы бері 436 523 адам COVID-19-дан емделіп, сауығып шықты. 21 шілдедегі мәлімет бойынша 64 367 адам коронавирустан емделіп жатыр. «Олардың ішінде 20 050 пациент стационарда, 44 317 науқас амбулаториялық деңгейде ем қабылдауда. 1 157 адамның жағдайы ауыр, 263 пациенттің жағдайы өте ауыр, 160 науқас өкпені жасанды желдету аппаратына қосылған», - деп жазылған хабарламада. Сондай-ақ коронавирус пен пневмониядан 62 адам өлімі тіркелді. Эпидемиологиялық ахуалды бағалау матрицасына сәйкес, Қазақстанның басым бөлімі «қызыл аймақта»: Нұр-Сұлтан, Алматы, Шымкент қалалары, Алматы, Ақмола, Ақтөбе, Атырау, Батыс Қазақстан, Жамбыл, Қарағанды, Қостанай, Қызылорда, Маңғыстау, Павлодар және Солтүстік Қазақстан облыстары. «Сары аймақта»: Түркістан және Шығыс Қазақстан облыстары тұр. Айта кетейік, елімізде коронавирусқа қарсы вакцинаның бірінші компонентін 4 965 516 адам, екінші компонентін 2 907 410 адам салдырды.