14 наурызды «Көрісу (қауышу) күні» (Амал) деп те атайды. Бұл күні ауыл тұрғындары іштей қамданып, жаңа жыл келіп жеткендей, жасына жас қосылғандай бір-біріне кезіккенде «Бір жасқа шығуыңмен», «Жасың құтты болсын!», деп бір-бірін құттықтап мәре-сәре болып жатады. Көрісу күні жасы кіші адамдар үлкен қарияларға барып баталарын алу жастарға парыз іспеттес. Ал үлкендер жағы кейінгілердің арнайы келіп көрісуін күтіп отырғандай. Сайып келгенде, көрісу сәттерінің жас ұрпақты адамгершілік-имандылық қасиеттерге баулитын тәрбиелік жағы басым. Осы орайда Қазалы аудандық орталық кітапхана қызметкерлері бұл күнді ерекше атап өтті.