Фишингтік шабуылдардың 96%-ы WhatsApp арқылы жасалады
Мамандар 2020 жылғы желтоқсаннан 2021 жылғы мамырға дейін әлемдегі танымал мессенджерлер арқылы фишингтік шабуылдардың динамикасын зерттеген. Олар фишингтік сілтемелер 90% жағдайда WhatsApp арқылы таралатынын анықтаған, деп хабарлайды inbusiness.kz.Қазақстандағы «Касперский Лабораториясының» мәліметінше, Қазақстанда да фишингтік шабуылдар, нақтырақ айтсақ 96%-ы WhatsApp арқылы жасалады екен. «Kaspersky» компаниясының Орталық Азиядағы коммерциялық директоры Валерий Зубановтың айтуынша, фишинг-алаяқтық бұрыннан бар. «Адамдар алаяқтарға жеке деректерін өздері береді. Мұндай деректі барлық жерден кездестіруге болады: электронды пошта, СМС, әлеуметтік желілер, жарнама. Енді алаяқтар мессенджерлерді пайдалана бастады. Алданып қалған адамдар көп», – деді директор. Осыған байланысты мамандар төмендегідей кеңестер береді: Желіде сақ болыңыз және сілтеме арқылы өтпес бұрын оны мұқият тексеріңіз! Сілтеме күмән тудырса, оған өтпегеніңіз жөн; Күдік тудыратын сілтемені таратпаңыз. Себебі, алаяқтар мұндай әдісті жиі пайдаланады. Олар адамдар таныстары жіберген ақпаратқа көбірек сенетінін түсінеді; Оңай ақша табу туралы ұсыныстарға, ұтыстар туралы хабарламаларға, тегін нәрсе беру туралы ақпаратқа сенбеңіз және оған сақтықпен қараңыз!
