118,8 мың азамат жұмысқа қағаз жүзінде қабылданған
Nur Otan партиялық бақылау комитетінің кезекті отырысында «Еңбек» мемлекеттік бағдарламасының жүзеге асырылуындағы кемшіліктер әшкереленді. Жобаны жүзеге асырып отырған еңбек және халықты әлеуметтік қорғау министрлігі мен ұлттық экономика министрлігінің жұмысына сын айтылды, деп хабарлайды inbusiness.kz.Мәжіліс депутаты Әлия Әбсеметованың айтуынша, бағдарламаны жүзеге асыру үшін соңғы 4 жылда республикалық бюджеттен шамамен 600 млрд теңге бөлінген. Қомақты қаражат босқа шашылған. Себебі бағдарламаның нысаналы индикаторлары бір-бірін айна қатесіз қайталаған. Азаматтарды жұмысқа қабылдау қағаз жүзінде атқарылған. 2019 жылы 118,8 мың азамат жұмысқа орналасқаны жалған мәлімет берілген. Бұл – тұрақты жұмысқа орналасқандардың жалпы санының 31%. «Жұмыс берушілер қызметкерлерін жұмыстан шығарып, оларды жұмыспен қамту орталықтары арқылы әлеуметтік жұмыс орындарына қайта жұмысқа қабылдаған. Адамдар бұрынғы жұмысын істей берген, бірақ мемлекет олардың табысының 35%-ын субсидиялаған. Осылайша жұмыс беруші өзінен жауапкершілік пен шығынды алып тастаған», –деді Әлия Әбсеметова.
