Оқушылар II тоқсаннан бастап дәстүрлі оқуға көшуі мүмкін
Алматы қаласы білім басқармасы ІІ тоқсанда оқушылар қалай оқитыны туралы мәлімдеме жасады. Қазір қала оқушыларының 96 проценті І тоқсанды онлайн оқып жатыр. Бұл туралы Aikyn.kz тілшісі хабарлайдыАлматы білім басқармасы басшысының орынбасары Қайрат Жұмановтың айтуынша, індет саябырлаған жағдайда бастауыш сынып оқушылары дәстүрлі түрде оқитын болады. Яғни науқастар саны тұрақты түрде азайған уақытта ғана санитарлық шаралар қатаң сақтала отырып, оқуды мектепке көшіру кезең-кезеңімен орындала бастайды.
Дәстүрлі оқуға алдымен 1-4 сынып оқушылары, ал кейіннен 5-11 сынып оқушылары көшіріледі.
Мұндай шешім Алматы қаласы тауарлар мен көрсетілетін қызметтердің сапасы мен қауіпсіздігін бақылау департаментімен бірлесе отырып қабылданған. Себебі департаменттің талдау нәтижесі кезекші сыныптарда оқитындар арасында коронавирус жұқтырғандар болмағанын көрсетті.
