Қазалыда мұнай-газ кешенінің қызметкерлері марапатталды
Елімізде жыл сайын қыркүйек айының алғашқы жексенбісінде мұнай-газ кешені қызметкерлері күні аталып өтіледі. Осыған орай бүгін Қазалы ауданы әкімдігінің мәжіліс залында бірқатар сала мамандары марапатталды.Басқосуда аудан әкімінің орынбасары Ғалымжан Еркебай мұнай-газ кешені қызметкерлерінің аймақтың әлеуметтік-экономикалық дамуына қосқан үлестері зор екенін айтып, кәсіби мерекемен құттықтады.
– Біздің қазыналы Қазалы жерінде де газ саласының қызметкерлері аймақтың әлеуметтік-экономикалық дамуына өзіндік үлестерін қосып келеді. Соның нәтижесінде Қазалы ауданының орталығы – Әйтеке би кентіндегі тұрғын үйлердің 85 пайызы табиғи газ желісіне қосылған.
Биыл «Жұмыспен қамтудың Жол картасы» бағдарламасымен Ғ.Мұратбаев ауылына газ апаруға қажетті қаржы қаралды. Қазіргі таңда құрылыс жұмыстары жүргізілуде. Бұдан бөлек, Қазалы қаласын газдандыру жұмыстарын бастауға аудандық бюджеттен 3,7 млн теңге бөлініп, сатып алу процедуралары жүруде, – деді аудан әкімінің орынбасары Ғалымжан Бақтығалиұлы.
Мұнан соң бір топ сала қызметкерлеріне аудан әкімінің «Алғыс хаты» тапсырылды. Сондай-ақ, мерекелік жиында құрылысшылар мерекесі қарсаңында «Құрметті құрылысшы» төсбелгісімен марапатталған ардагер құрылысшы Кеңес Бабанаевқа наградасы табысталды.
"ҚАЗАЛЫ" ақпарат
