Биыл агроөнеркәсіптік кешен өнімдері экспортының көлемі артты

Бұл туралы ҚР Ауыл шаруашылығы министрі Ербол Қарашөкеев Үкімет отырысында баяндады, деп жазады egemen.kz

Министр мәліметінше 2021 жылдың 9 айында агроөнеркәсіптік кешен өнімдері экспортының көлемі 2,6 млрд АҚШ долларды құраған.
«Экспортталатын өнім көлемін ұлғайту мақсатында министрлік өңделген өнім экспортына басымдық бере отырып, ауыл шаруашылығы өнімінің экспорттық әлеуетін дамыту бойынша жоспарлы жұмыс жүргізуде. 2021 жылдың 9 айында агроөнеркәсіптік кешен өнімдері экспортының көлемі 2,6 млрд АҚШ долларын құрап, 2020 жылдың осындай кезеңімен салыстырғанда 14,3%-ға өсті (2020 жылдың 9 айында – 2,2 млрд АҚШ доллары)»,  деді Е. Қарашөкеев.
Оның айтуынша, өңделген агроөнеркәсіптік кешен өнімдері экспортының көлемі 950,5 млн АҚШ долларын құрады, бұл 2020 жылдың осындай кезеңінен салыстырғанда (928,5 млн. АҚШ доллары) 2,4%-ға жоғары.
«Агроөнеркәсіптік кешен өнімдері экспортының құрылымында өңделген өнім экспортының үлесі 37%-ды құрады», деді министр.