Жеңімпаз жерлестер мерейі
Сәрсенбі күні аудан әкімі Мұрат Ергешбаев Шымкентте өткен әйелдер боксынан Қазақстанның V жазғы спартакиадасының жеңімпазы Ақерке Бақытжан мен қола медаль иегері Аида Оңдаш және Қостанайдағы ауыр атлетикадан жасөспірімдер арасындағы ел біріншілігінің чемпиондары Алтынай Тәңірберген, Таисия Алексееваны қабылдап, спортшыларды жеңісімен құттықтады.– Ел біріншілігінде топ жарып, туған жердің намысын биікке көтерген жеңістеріңізбен шын жүректен құттықтаймын. Мұндай жоғары жетістік өзінен-өзі келмейтіні белгілі. Ол үшін жаттығу залында аянбай тер төгіп, бапкердің берген тапсырмасын жүз проценттен асырып орындау қажет. Сонда ғана жеңіс те, жетістік те келе бастайды. Оған сіздер анық мысал бола аласыздар. Сіздер алған бұл асу өскелең ұрпаққа үлгі-өнеге болады, – деген Мұрат Нәлхожаұлы ауданда бұқаралық спортты дамыту бағытында атқарылған қыруар жұмыстарға тоқталып өтті.
Мұнан соң аудан басшысы боксшылар мен ауыр атлетшілерді және Қазақстан Республикасының еңбек сіңірген жаттықтырушысы Бақытбек Құлбаев пен Әзиз Жақсылықты, №17 олимпиадалық резервтің мамандандырылған балалар-жасөспірімдер мектебінің директоры Қуанған Бәкеновті Алғыс хатпен марапаттап, бағалы сыйлық табыстады. Өз кезегінде Қуанған Бәкенов пен Бақытбек Құлбаев жеңіске жеткен жерлестерді қабылдап, құрмет көрсеткен аудан басшысына алғыс айтты. Шәкірттерінің алдағы уақытта бұдан да жоғары жетістіктерге қол жеткізетініне сенім білдірді.
Жеңісбек СОВЕТҰЛЫ
