Кей өңірде аптап ыстық, кей жерде нөсер жауады: 16 тамызда Қазақстанда ауа райы қандай болады?
Фото ЖИСиноптиктер 16 тамызда Қазақстанның бірқатар өңірінде ауа райы құбылатынын ескертті. Елдің әр бөлігінде найзағай, нөсер жаңбыр, бұршақ, екпінді жел, тұман және шаңды дауыл күтіледі. Ал оңтүстікте аптап сақталып, ауа температурасы 40 градусқа дейін көтеріледі, деп хабарлайды Ulysmedia.kz.
Мән-жайы
Ақмола облысында жаңбыр мен найзағай күтіледі. Кей жерлерде нөсер жауып, бұршақ түсіп, дауылды жел соғуы мүмкін. Жекелеген аудандарда жел екпіні секундына 15-20 метрге дейін күшейеді.
Шығыс Қазақстан облысында жаңбыр, найзағай, бұршақ және дауылды жел болжанып отыр. Күндіз жел екпіні секундына 23 метрге дейін жетуі ықтимал.
Осындай ауа райы Абай және Павлодар облыстарында да күтіледі.
Солтүстік Қазақстан облысында түнде кей жерлерде найзағай ойнап, бұршақ аралас қатты жаңбыр жауады. Жел екпіні секундына 23-28 метрге дейін күшеюі мүмкін.
Петропавлда да түнде жаңбыр, найзағай және бұршақ күтіледі.
Астанада өткінші жаңбыр жауып, найзағай ойнайды. Күндіз бұршақ пен дауылды жел болуы мүмкін. Жел екпіні секундына 15-20 метрге дейін жетеді.
Оңтүстікте 40 градусқа дейін ыстық болады
Түркістан облысында күндіз ауа температурасы 40 градусқа дейін көтеріледі. Таулы аудандарда өткінші жаңбыр, найзағай және дауылды жел болуы мүмкін. Ал облыстың батысы мен солтүстігінде шаңды дауыл күтіледі.
Жамбыл облысында да ауа температурасы 38-40 градусқа дейін барады. Таулы жерлерде найзағай ойнап, кей аумақта жел екпіні секундына 20 метрге дейін күшеюі мүмкін.
Алматы облысында күндіз 35-38 градус ыстық болады.
Алматыда ауа температурасы 35-37 градусқа, Қонаевта 36-38 градусқа дейін көтеріледі. Іле Алатауының таулы бөлігінде өткінші жаңбыр жауып, найзағай ойнап, екпінді жел соғады.
Жетісу облысында күн 35-39 градусқа дейін ысиды. Талдықорғанда 37-39 градус ыстық болады деп күтіледі.
Шаңды дауыл мен қатты жел күтіледі
Шаңды дауыл Ақмола облысының батысында, түнде Қызылорда облысының орталығында, сондай-ақ күндіз Түркістан облысының батысы мен солтүстігінде болуы мүмкін.
Маңғыстау, Ақтөбе, Батыс Қазақстан, Қостанай және басқа да облыстарда қатты жел болжанып отыр. Көп өңірде жел екпіні секундына 15-20 метрге дейін жетеді.
Батыс Қазақстан және Қостанай облыстарында түнде және таңертең кей жерлерде тұман түсуі мүмкін.
Өрт қаупі жоғары
Аптап ыстыққа байланысты аталған өңірлердің басым бөлігінде өрт қаупі жоғары немесе төтенше деңгейде сақталады.
Әсіресе Жетісу, Маңғыстау, Жамбыл, Ақтөбе, Қызылорда және Түркістан облыстарында, сондай-ақ Алматы, Шығыс Қазақстан, Абай және басқа да облыстардың кей аудандарында өрт шығу қаупі өте жоғары болады.
