Коммуналдық саладағы реформа: өңірлерде ақылды есептегіштер орнату жоспары бекітіледі
Фото: DepositphotosҮкімет отырысында Премьер-министрдің орынбасары Қанат Бозумбаев коммуналдық инфрақұрылымды жаңғырту және ТКШ саласын цифрлық трансформациялау бойынша негізгі міндеттерді айқындады. Жөндеу жұмыстарын өз уақытында аяқтауға, өңірлерді есептегіштермен қамтамасыз етуге және әлеуметтік төлемдерді автоматтандыруға басымдық берілді, деп хабарлайды Almaty.tv.
Вице-премьер өңір әкімдіктері Ұлттық жоба аясындағы ағымдағы жобалардың іске асырылуын ерекше бақылауға алуы тиіс екенін және алдағы кезеңдерге жоспарланған барлық өңірлік нысандар бойынша дайындық жұмыстарын алдын ала бастау қажеттігін атап өтті.
Баяндама барысында заманауи цифрлық құралдарды енгізуге және халық үшін мемлекеттік көмектің қолжетімділігін арттыруға ерекше назар аударылды.
«Цифрландыруды жүзеге асыру тұтынушыларды есептеу құралдарымен толық қамтамасыз етусіз мүмкін емес. Осыған байланысты Энергетика, Өнеркәсіп және құрылыс министрліктері әкімдіктермен бірлесіп, әрбір өңір бойынша есептеу құралдарын орнату қажеттілігін қысқа мерзімде анықтауы және Ұлттық экономика министрлігімен бірлесіп, осы жобаларды іске асыру жөніндегі нақты іс-шаралар жоспарын бекітуі қажет. Бұдан бөлек, коммуналдық қызметтерді төлеуге тұрғын үй көмегін тағайындау процестерін толық автоматтандыру мақсатында Өнеркәсіп және құрылыс министрлігі Еңбек және халықты әлеуметтік қорғау министрлігімен, сондай-ақ әкімдіктермен бірлесіп, қысқа мерзімде бірыңғай есептеу орталықтарының мемлекеттік ақпараттық жүйелермен тиісті интеграциясын қамтамасыз етуі тиіс», — деді Қанат Бозумбаев.
Есептеу орталықтарын мемлекеттік деректер базаларымен толық интеграциялау азаматтарға артық анықтамаларсыз тұрғын үй көмегін алуға мүмкіндік береді, ал процестерді автоматтандыру коммуналдық төлемдер мен субсидияларды есептеуді ашық әрі тиімді етеді.
Подробнее
