Теледидар экранын қалай дұрыс тазалау керек? Мамандар кеңесі

Фото: Жасанды интеллект

Теледидар экранында уақыт өте келе шаң, саусақ іздері мен түрлі дақтар жиналады. Алайда экранды тазалауда жіберілген қателік оның бетіне сызат түсіріп, қорғаныш қабатын зақымдауы немесе тіпті құрылғы істен шығуы мүмкін. Сондықтан мамандар теледидарды тазалаудың қарапайым, бірақ маңызды ережелерін ұстануға кеңес береді. Бұл туралы Baribar.kz хабарлап отыр.

Теледидарды тазаламас бұрын

Ең алдымен теледидарды өшіріп немесе электр желісінен ажыратып қойған жөн. Бұл қауіпсіздікті қамтамасыз етіп қана қоймай, экрандағы шаң мен дақтарды анық көруге мүмкіндік береді.

Экранды немен сүрткен дұрыс?

Мамандар теледидардың жақтауы мен экранын тазалау үшін жұмсақ, таза, түк қалдырмайтын құрғақ матаны қолдануға кеңес береді. Ең қолайлысы – микрофибрадан жасалған шүберек.
Экрандағы саусақ іздері мен жеңіл дақтарды микрофибра шүберекпен ақырын сүртіп тазалауға болады. Бұл кезде экранға қатты күш түсірмеу керек.

Экранға су шашуға болмайды!

Экрандағы кір құрғақ сүрткенде кетпесе, микрофибра шүберекті аз ғана сумен дымқылдауға болады. Бірақ суды немесе басқа кез келген сұйықтықты тікелей теледидар экранына шашуға болмайды.
Өндірушінің айтуынша, теледидардың ішіне сұйықтықтың түсуі құрылғының істен шығуына, өрт шығуына немесе электр тогының соғу қаупіне себеп болуы мүмкін.

Теледидар корпусын қалай тазалайды?

Теледидардың сыртқы панелі мен корпусын аздап суланған микрофибра шүберекпен сүртуге болады. Тазалап болған соң қалған ылғалды міндетті түрде құрғақ жұмсақ матамен сүртіп алу қажет.
Тазалағанда экран мен корпусты қатты сүртпеген дұрыс. Өйткені күшпен сүрту экран бетіне сызат түсіруі мүмкін.