Алдағы күндері +40 градусқа дейін ыстық болады
istockphoto.com«Қазгидромет» синоптиктері 30, 31 мамыр және 1 маусым күндеріне арналған ауа-райы болжамын ұсынды, деп хабарлайды turkystan.kz.
Синоптиктердің болжамынша, алдағы үш күнде атмосфералық фронттардың өтуіне байланысты Қазақстанның солтүстігінде, оңтүстігінде және батысында ауа райы құбылмалы болады. Кей жерлерде жаңбыр жауып, найзағай ойнайды.
«30-31 мамыр күндері Батыс Қазақстан, Атырау, Маңғыстау, Ақтөбе және Қостанай облыстарында қатты жаңбыр жауып, бұршақ түсіп, екпінді жел соғады. Елдің қалған аумағында жауын-шашынсыз ауа райы сақталады», – деді метеорологтар.
Республика бойынша желдің күшеюі күтіледі, ал оңтүстік өңірлерде шаңды дауыл болуы мүмкін.
Сондай-ақ Қазақстан бойынша күндізгі ауа температурасы батыста +20...+25 градусқа дейін, солтүстік, шығыс және орталық өңірлерде +23...+38 градусқа дейін, ал оңтүстікте +30...+40 градусқа дейін көтеріледі.
