Енді VIP-нөмірге онлайн тапсырыс беруге болады
Фото: DepositphotosЕнді автокөлікке арналған мемлекеттік нөмірді «ЦОН» мобильді қосымшасы арқылы онлайн таңдап, тапсырыс беруге болады.
Бұл жөнінде «Азаматтарға арналған үкімет» мемлекеттік корпорациясы хабарлады.
Жаңа цифрлық қызмет арнайы ХҚКО-ларға жеке бармай-ақ, мемлекеттік нөмірге онлайн өтінім беру мүмкіндігін ұсынады.
«Өтінімді рәсімдеу толықтай онлайн форматта іске асырылады және бірнеше минутты ғана алады. Қолданушы "ЦОН" мобильді қосымшасына кіріп, авторизациядан өтіп, "Мемлекеттік нөмірге тапсырыс беру" қызметін таңдайды. Одан кейін қалаған сериясы мен нөмір комбинациясын енгізеді. Өңір автоматты түрде азаматтың тіркелген мекенжайына сәйкес анықталады», – делінген ресми ақпаратта.
Нөмір болған жағдайда өтінім беруші төлем жасап, дайын нөмірді алу үшін ыңғайлы бөлімшені таңдай алады. Таңдалған нөмір бос болмаса, жүйе оны хабарлап, басқа нұсқаны енгізуді ұсынады.
Қызмет Қазақстан Республикасы Ішкі істер министрлігінің ақпараттық жүйелерімен интеграцияланған. Бұл таңдалған мемлекеттік нөмірдің бос немесе бос еместігін бірден тексеруге мүмкіндік береді. Жүйе енгізілген нөмір комбинациясының мәртебесін автоматты түрде көрсетеді.
