Ән мәтінінің психологияға ықпалы бар екені дәлелденді
Жаңа ғылыми зерттеу ән мәтіндері тыңдарманның ойына, сезіміне және мінез-құлқына тікелей әсер ететінін көрсетті. Psychology of Music журналында жарияланған ауқымды талдау нәтижесіне сәйкес, белгілі бір мазмұндағы әндерді тыңдау қайырымдылыққа бейімділікке, эмпатия деңгейіне, агрессияға дейін ықпал етуі мүмкін, деп хабарлайды turkystan.kz psypost.com-ға сілтеме жасап.
Қазір музыка күнделікті өмірдің ажырамас бөлігіне айналған. Зерттеулерге сүйенсек, орта есеппен алғанда, адам күніне шамамен үш сағат музыка тыңдайды. Ең танымал жанрларда махаббат, алкоголь мен есірткі, әлеуметтік қарсылық, зорлық-зомбылық секілді тақырыптар жиі кездеседі. Осы себепті педагогтар мен психологтар мұндай мазмұнның, әсіресе тұлғалық қалыптасу кезеңіндегі жасөспірімдер мен жастарға әсеріне алаңдаушылық білдіруде.
Соған қарамастан, көптеген тыңдарман ән мәтіндері өздеріне әсер етпейді деп есептейді. Бұл сенім жеке таңдау еркіндігіне немесе белгілі бір орындаушылармен өзін сәйкестендіруге байланысты қалыптасады.
Алайда зерттеу авторлары бұл көзқарасты ғылыми тұрғыда тексеруді мақсат еткен. Ғалымдар ән мәтіндері психологиялық стимул ретінде эмоциялық күйге, көзқарасқа және мінез-құлыққа болжамды түрде әсер ете ала ма деген сұраққа жауап іздеген. Бұл жұмыс, әсіресе, музыканы сын тұрғысынан талдауға үйрететін critical music education бағыты үшін маңызды.
Валенсия университетінің профессоры, зерттеу авторларының бірі Пабло Марин Льебана «сыни музыкалық білім берудің мақсаты – студенттерді өздері тұтынатын музыканың қоғаммен байланысын талдауға үйрету» екенін атап өтті.
Ғалымдар болашақта ән мәтіндерін ұзақ уақыт бойы, табиғи ортада қайталап тыңдаудың әсерін зерттеу қажет екенін айтады. Сонымен қатар, түрлі музыкалық жанрлар мен тыңдарман топтарын қамтып, ырғақ пен темп секілді музыкалық элементтердің мәтін әсерін күшейте ме, әлде әлсірете ме – соны анықтау да маңызды бағыт ретінде көрсетілген.
