Енді елімізде жылу ақысы балкон үшін есептеледі: Бірақ ереже барлығына қатысты емес
Фото: pixabay.comЕнді елімізде жылу ақысы балкон үшін де алынады. Демек қылтиманың шаршы метріне байланысты ай сайынғы төлемге ақша қосылуы мүмкін. Бірақ Ұлттық экономика министрлігі өкілдерінің айтуынша, бұл тәртіп барлығына бірдей қатысты емес. Тариф есептелгенде балконды қандай мақсатта қолданып отырғанына мән беріледі екен. Бұл туралы Stan.kz ақпарат агенттігі 31-арнаның “Информбюро” бағдарламасына сілтеме жасап хабарлайды.
Балкон үшін жылуға төлеу-төлемеу мәселесі жалпы үйдегі есептеуіш құралдың болу-болмауына байланысты. Санайтын құрал жоқ, ал балкон қонақ не ас бөлмеге жалғанса, оның аумағы пәтердің жалпы ауданы ретінде есептеледі. Осылайша оның да шаршы метрі тарифке әсер етеді.
Мысалы, пәтердің тұрғылықты аумағы 50 шаршы метр, ал балкон 5 шаршы метр. Ал жылу ақысы үйдің ауданына қарай есептеледі дерлік. Сіз балконды ортадағы қабырғаны бұзып, бір бөлмеге жалғап қосасыз. Осылайша техникалық құжат бойынша пәтердің ауданы 55 шаршы метр болады. Мұндай өзгерістен кейін жылу тарифі қымбаттайды.
“Балконды мысалы қонақ бөлмесіне қосқан жағдайда онда ол пайдалы ауданға кіреді. Оған төлемақы ескерілетін болады. Есептегіш құрал болса ол нақты қанша қолданды, соған байланысты төлейді”, – деді ұлттық экономика министрлігі табиғи монополияларды реттеу комитетінің басқарма басшысы Ақтөре Дидаров.
Жылу тарифін есептеуге қатысты тәртіп көбіне ескі үйлерге әсер етеді. Себебі бүгінде жаңа баспаналар есептеуіш құралмен қамтамасыз етілген. Тұрғыны балконды қоссын-қоспасын, бөлмесін кеңейтсін-кеңейтпесін қолданғанына қарай ақысын өтейді.
Заңға сәйкес, баспанада бір бөлме үлкейіп, екіншісі кішірейген кезде, балкон қосылып не бөлінсе мүліктің кадастрлық құжаты жаңартылады. Алайда үйді сатқан кезде ескі паспорты да жарай береді. Ол заңды күшін жоғалтпайды. Бірақ "Азаматтарға арналған үкімет" мемлекеттік корпорациясының хабарлауынша, пәтерді ипотека арқылы рәсімдегенде банктер жаңартылған техникалық құжатты талап етеді.
