Үйлесімді жұмыс – үлкен жауапкершілік

Аудан әкімінің міндетін атқарушы Жалғас Сүйеубаевтың айтуынша, биылғы жылы аудан көлемінде егіс алқаптарын сумен қамтамасыз етуге ерекше көңіл бөлінді. «Қазалысушар» өндірістік учаскесіндегі 3 дана, ауылшаруашылық құрылымдарындағы 9 дана және елді-мекендердің меншігіндегі 26 дана су насосы толықтай іске қосылып, егісті сумен қамтамасыз ету жұмыстары күшейтілді. Бірақ Сырдария өзеніндегі су деңгейінің төмендеуі қосымша шараларды талап етті.

Осыған байланысты Қазақстан Республикасы Төтенше жағдайлар министрлігі мен Су ресурстары және ирригация министрлігі бірлесіп, облысқа 25 дана дизельді су насосын және арнайы мамандарды жіберді. Оның ішінде 4 дана насос Қазалыға бағытталып, «Жалаңтөс батыр» және «РЗА Агро» шаруа қожалықтарының жалпы 170 гектардан астам жерін сумен қамтуға мүмкіндік берді. Бұл насос қондырғылары шілде айынан бастап екі ауысыммен үздіксіз жұмыс істеп, егістік алқаптарындағы су тапшылығын айтарлықтай төмендетті.

Мемлекет басшысы мен Үкіметтің сенімді қолдауымен уақытылы қабылданған шешімдер мен нәтижелі келіссөздер арқылы биылғы жылы егіс алқаптары қажетті су көлемімен қамтамасыз етіліп, егінді мүмкіндігінше шығынсыз жинап алу үшін кешенді шаралар жүзеге асырылды. Осы тұрғыда Қазақстан Республикасы Төтенше жағдайлар министрлігінің қызметкерлерінің еңбегі айрықша маңызды әрі бағалы болды.

«Вегетациялық кезеңде аудандағы егіс алқаптарын сумен қамтамасыз ету – ауыл шаруашылығы үшін өте маңызды міндет. Биыл бұл қиын жұмысқа Ақтөбе, Қостанай және Маңғыстау өңірлерінен арнайы келіп, төтенше жағдайлар саласының мамандары үлкен көмек көрсетті. Олардың кәсіби біліктілігі мен қажырлы еңбегі арқасында көптеген шаруашылықтар егістерін суармалап, жақсы өнім алуға мүмкіндік алды. Осы орайда, барша мамандарға және көмек көрсеткен қызметкерлерге жүрекжарды алғысымды білдіремін. Біз әрі қарай да ауыл шаруашылығын дамыту үшін осындай жүйелі жұмыстарды жалғастыруымыз қажет», – деді аудан әкімінің міндетін атқарушы Жалғас Сүйеубаев.

Айта кету керек, биыл аудан көлемінде жалпы 17 мың 445 гектарға ауыл шаруашылығы дақылдары егілді. Оның ішінде күріш дақылы 5 мың 636 гектар жерге орналастырылды. Жақын арада, яғни қыркүйек айының алғашқы онкүндігінде, аудан бойынша егін орағы науқаны басталатын болады. Бұл маңызды шара ауыл шаруашылығының өнімділігін арттыруға және егін жинау жұмыстарын тиімді ұйымдастыруға бағытталған.

Қазалы ауданының су тапшылығын еңсерудегі тәжірибесі еліміздің басқа аймақтары үшін де құнды үлгі болары анық. Бірлік пен ынтымақтастық арқылы кез келген қиындық жеңіл шешіледі. Осындай үйлесімді жұмыс алдағы уақытта ауданды дамудың жаңа биіктеріне жеткізіп, ауыл шаруашылығының тұрақты өсуіне жол ашары анық.