Қазақстанда көлік жөндеудің бірыңғай бағасы бекітілмек

Фото: Ru.freepik.com

Елімізде көлік жөндеудің бірыңғай бағасы бекітіліп, Қаржы нарығын реттеу агенттігі автокөлікке қажетті қосалқы бөлшектер құнының ортақ тізімін жасамақ. Бұл туралы Stan.kz ақпарат агенттігі 31-арнаның Информбюро жаңалықтар қызметіне сілтеме жасап хабарлайды.

Бұл бастама көлікті міндетті сақтандырудың қажет кезде шығынды жаппауынан туып отыр. Қаржы нарығын реттеу агенттігі өкілі Мария Хаджиеваның айтуынша, түскен шағымның 90 пайызы дәл сол шығынды санауға қатысты деп отыр. Сондықтан ведомство көлік бөлшектері бағасының бірыңғай анықтамалығын дайындамақ.

Бірегей анықтамалықты жасау автокөлік бөлшектерінің бағаларын бірдей ету деген сөз емес. Оның міндеті – орташа нарықтық бағалар немесе ресми жеткізушілердің бағалары негізінде залалды бағалаудың бірыңғай әдісін енгізу.

“Ескере кететіні, қазір елде көлік бөлшектері бағасының бірыңғай анықтамасы жоқ. Агенттік сол себепті де сақтандыру компаниялары мен зардап шеккендер арасында келіспеушілік көбейді дейді. Ал авто сарапшылардың пікірінше, көлік саймандарының құнын сараптау ісі бүгін-ертең, 1-2 жылда бітпейді. Одан да сақтандыру компанияларының жауапкершілігін арттырсын деп талап қойып отыр”, – дейді қаржы нарығын реттеу және дамыту агенттігінің баспасөз қызметі.

Ведомствоның мәліметінше, бірыңғай бағаны сараптағанда өндірушілер мен ресми диллерлердің деректері қолданылмақ. Яғни, базар бағасы есепке алынбайды. Сондай-ақ логистика шығындарына да мән беріледі. Әзірге болжам бойынша бастама келесі жылдың аяғына дейін іске асып қалуы тиіс. Айта кетейік, биыл жарты жылда сақтандыру компаниялары қазақстандықтардан жалпы 66 миллиард теңгеден астам ақша жинаған. Ал өтеген шығыны шамамен 50 миллиард теңге.

“Агенттік сақтандыру компанияларына қадағалауды күшейту қажет. Шығынның өтелмегеніне компаниялар жеке жауапкершілік алуы тиіс. Бүгінде бағалау мәселесі ақсап тұр. Сақтандыру компанияларының өзі жол апаты мен көлік санының көбейгенін, ал жиналатын ақша шығынды жабуға жетпейтінін айтады. Бірақ сақтандырушылар біреу емес қой. Міндетті сақтандырумен айналысатын 20-дан астам компания бар. Жауапкершілікті арттырса және жұмысын жүйелесе бағаның тізімін жасаудың қажеті шамалы”, – дейді "Қазақстан бағалаушылар достастығы” бағалаушылар палатасының басқарма өкілі Михаил Будянский.

Бұған дейін Қазақстанда сақтандыру компаниялары жол апатында қаза тапқан адамдардың мұрагерлеріне өтемақы төлеуге міндеттелетінітуралы жазған едік.