Жұрт ағылған жәрмеңке
Қоғам сұранысына сай, халыққа сапалы әрі арзан өнім ұсыну – күн тәртібіндегі маңызды мәселе. Осы ретте өткен сенбіде Әйтеке би кентіндегі «Нұршуақ» автобекеті алаңында ауыл шаруашылығы өнімдерінің жәрмеңкесі ұйымдастырылып, аудан жұртшылығы сапалы әрі қолжетімді азық-түлікке қол жеткізді.Аталған шараға ауданға қарасты барлық ауылдық округтер мен жергілікті шаруашылықтар белсенді түрде қатысып, өз өнімдерін базар бағасынан төмен бағада ұсынды. Ет, сүт, балық, көкөніс сынды азық-түлік және өнімдері, сондай-ақ дәнді дақылдар молынан саудаланды.
Жәрмеңке барысында аудан әкімінің міндетін атқарушы Жалғас Сүйеубаев арнайы келіп, өнім өндірушілермен және тұтынушылармен тілдесті. Ол бұл бастаманың негізгі мақсаты – халыққа сапалы әрі табиғи өнімдерді тиімді бағада ұсыну екенін атап өтті. Сонымен бірге жергілікті ауыл шаруашылығы өнімдеріне қолдау көрсету, шаруалардың еңбегін бағалау – әрдайым басым бағыттардың бірі екенін жеткізді.
– Мұндай жәрмеңкелер – ауыл еңбеккерлері мен тұтынушы арасындағы алтын көпір. Осы арқылы ел экономикасының негізі – ауыл шаруашылығы саласының тыныс-тіршілігімен халық етене танысып, тікелей байланыс орнайды, – деді Жалғас Оңғарұлы.
Тұрғындар мұндай жәрмеңкелердің жиі өткізіліп тұруы әлеуметтік жағынан да, экономикалық жағынан да тиімді екенін айтуда. Бірі табиғи өнімге қуанса, енді бірі нарық бағасымен салыстырғанда үнем болғанын жеткізді.
– Осындай жәрмеңке жиі өткізіліп тұрса жақсы болар еді. Бағасы қолжетімді, әрі табиғи әрі жергілікті өнімдер, – дейді кент тұрғыны Ардақ апай.
Айта кетейік, жәрмеңкені ұйымдастырушы – Қазалы аудандық ауыл шаруашылығы және жер қатынастары бөлімі. Алдағы уақытта да бұл бағыттағы жұмыстар жалғасын табатын болады.
Бекзат АСАН
