Ғалымдар кофеиннің көңіл күйге әсерін анықтады
Фото: pixabay.comНеміс ғалымдарының зерттеуі кофеиннің күнделікті өмірде көңіл күйге оң әсер ететінін көрсетті. Ең айқын әсер таңғы уақытта, яғни оянғаннан кейінгі алғашқы сағаттарда байқалады. Зерттеу нәтижелері Scientific Reports (Sci Rep) журналында жарияланды, деп хабарлайды El.kz интернет порталы.
Екі–төрт апта бойы 230-дан астам жас қатысушы арнайы мобильді қосымшада соңғы бір жарым сағатта кофеинді сусын ішкен-ішпегенін және өз көңіл күйін белгілеп отырған. Нәтижесінде, кофе немесе шай ішкеннен кейін қуаныш пен сергектік деңгейі артқаны анықталды. Әсіресе бұл әсер таңғы алғашқы 2,5 сағатта ерекше байқалды. Ал теріс эмоциялардың азаюы тұрақты түрде тіркелмеген.
Зерттеуде кофеиннің әсері адамның жағдайына байланысты өзгеретіні де белгілі болды: егер адам шаршаған болса, оның ықпалы күштірек, ал әлеуметтік ортада, яғни басқа адамдармен бірге болғанда әсері әлсіздеу. Айта кетерлігі, кофеинді әдеттегі мөлшерде пайдалану деңгейі, ұйқы сапасы немесе мазасыздық пен депрессияға бейімділік бұл нәтижеге әсер етпеген.
Ғалымдар кофеиннің, әсіресе таңертең, позитивті көңіл күйді көтеруге көмектесетінін айтады. Дегенмен, зерттеу бақылау сипатында болғандықтан, себеп-салдарлық байланысты нақты дәлелдей алмайды.
Бұған дейін де ғалымдар қантсыз шайды тұрақты тұтыну ерте өлім қаупін азайтып, қатерлі ісік пен жүрек-қан тамыр ауруларынан болатын өлім-жітімнің төмендеуімен байланысты екенін анықтаған болатын.
