Заңсыз алкоголь айналымнан алынды
Аудандағы Мемлекеттік кірістер басқармасы алкоголь өнімдерінің заңсыз айналымын анықтау және алдын алу мақсатында ауқымды тексеру жұмыстарын жүргізді. Бұл шара көлеңкелі экономиканың алдын алу, салықтық тәртіпті нығайту және қоғамдық қауіпсіздікті қамтамасыз етуді көздейді.Тексеру барысында ілеспе құжаттарсыз сатылымға шығарылған 207 литр алкоголь өнімі тәркіленіп, хаттама толтырылды. Аталған өнімнің нарықтағы жалпы құны 320,2 мың теңгені құрайды. Бұл заңсыз өнімдерге қатысты әкімшілік шаралар қолданылып, қажет болған жағдайда қылмыстық жауапкершілік те қарастырылады.
Қазақстан Республикасының заңнамасына сәйкес, алкоголь өнімдерін сату үшін арнайы лицензия қажет. Сонымен қатар әрбір өнімге ілеспе құжаттар болуы шарт. Бұл талаптар өнімнің сапасын бақылауға, тұтынушылардың денсаулығын қорғауға және салықтық түсімдерді қамтамасыз етуге бағытталған.
Заңсыз алкоголь өнімдері тек экономикалық зиян келтіріп қана қоймай, тұтынушылардың денсаулығына да үлкен қауіп төндіреді. Сапасыз және бақылаусыз өнімдер улану, созылмалы аурулар және басқа да денсаулыққа зиянды әсерлерге әкелуі мүмкін. Сондықтан тұрғындардан алкоголь өнімдерін тек лицензияланған дүкендерден сатып алуға және күмәнді өнімдер туралы тиісті органдарға хабарлауға шақырамыз.
Ауданда жүргізілген бұл тексеру жұмыстары заңсыз алкоголь өнімдерінің айналымын азайтуға және қоғамдық қауіпсіздікті қамтамасыз етуге бағытталған маңызды қадам болып табылады. Мемлекеттік кірістер басқармасы алдағы уақытта да осындай шараларды жалғастыра отырып, заңсыз әрекеттерге қарсы күресті күшейтуді жоспарлап отыр.
А. ҚУАНТҚАНҚЫЗЫ
