Дәріханалардағы 5 мыңнан астам дәрі-дәрмектің бағасы 30%-ға дейін арзандауы мүмкін
Фото: www.istockphoto.com– Дәрілік заттардың шекті бағасын белгілеу моделі өзгертілді. Бұрын шекті бағаларға енгізілген, бүгінде негізсіз деп танылған кейбір үстемеақы алып тасталды. Фармацевтикалық қоғамдастықпен бірге аталған модельді сынақтан өткізу бағытында белсенді жұмыс жүргізіп жатырмыз. Нәтижесінде, ТМККК және МӘМС шеңберіндегі дәрі-дәрмектің бағасы шамамен 19%-ға, ал көтерме-бөлшек саудадағы баға шамамен 30%-ға төмендейді деп күтудеміз, – деді Е.Нұрлыбаев.
Оның айтуынша, шекті бағаны реттеу тетігі қайта қаралған соң дәрі-дәрмектің бағасы халық үшін емханалар мен стационарлар арқылы ұсынылатын тегін тізбеде де, сондай-ақ бөлшек дәріханаларда да барынша қолжетімді болмақ. Жаңартылған препараттардың тізбесі ТМККК және МӘМС шеңберінде – 3 475 дәрілік заттың және 2 917 медициналық бұйымның атауын, ал көтерме және бөлшек сауда үшін 5 936 атауды қамтиды.
ДСМ вице-министрінің дерегіне сәйкес, бағаны төмендетудің орташа көрсеткіші келесідей болуы мүмкін: 2 222 дәрі-дәрмек аталымы бойынша – 18%-ға дейін, 1 847 медициналық бұйымның түрі бойынша – 14%-ға дейін, дәріханалардағы 5 492 дәрі-дәрмектің аталымына қатысты баға 30%-ға дейін арзандауы ықтимал.
Естеріңізге сала кетейік, бүгінде елімізде осы салада 207 қазақстандық тауар өндіруші жұмыс істейді. Отандық фармкәсіпорындардың тек 43-і дәрілік заттарды өндіреді. Көпшілігі, 164-і медициналық бұйымдар жасаумен айналысады.
