Қазақстанда суицидке бейім 500-ге жуық сарбаз әскерден босатылды
Әдістеме кезең-кезеңімен барлық өңірлерде енгізіледі.
Фото: ҚР Қорғаныс Министрлігі
Фото: ҚР Қорғаныс МинистрлігіБиылғы әскерге шақыру науқанында Қазақстанда 470 шақырылушыда суицидке бейімділік анықталды. Бұл туралы Қорғаныс министрлігі хабарлады, деп хабаралйды Skifnews.kz ақпарат порталы.
Әскерге шақырылушылардың психологиялық ауытқуларын анықтауға үкімет тапсырмасымен әскери психологтар әзірлеген Psy-risk әдістемесі көмектесті. Аталған азаматтардың бір бөлігі әскерден босатылып, енді бір бөлігі қосымша тексеруге жіберілді.
“Жаңа жүйе – көпсатылы психодиагностика механизмі. Ол бастапқы скринингтен, тереңдетілген психологиялық тексеруден және қажет болған жағдайда психиатриялық сараптамадан тұрады. Басты мақсат – психоэмоционалдық тұрақтылығы жеткіліксіз азаматтарды Қарулы күштер қатарына шақырмау”, – делінген хабарламада.
Әдістеме кезең-кезеңімен барлық өңірлерде енгізіледі.
“Біз тек психологиялық тұрғыда тұрақсыздарды анықтаумен шектелмейміз. Мақсат – болашақ әскери бөлімдердің ұжымдарын ықтимал қауіп-қатерден қорғау. Бұл – денсаулық, өмір және бөлімдердегі моральдық ахуал мәселесі”, – деді Қорғаныс министрлігінің психологиялық және әлеуметтік жұмыс басқармасының бастығы, подполковник Арман Қалышев.
