Қазақстанда валюта бағамы көрсетілген таблоларға тыйым салынды

 Енді олар тек ішкі кеңістікте орнатылады

Фото: pixabay
Қазақстанда көшелердегі электронды валюта таблоларын алып тастау туралы Ұлттық банктің төрағасы Тимур Сүлейменов қол қойған жаңа қаулы қабылданды, деп хабарлайды Azattyq Rýhy КТК телеарнасына сілтеме жасап.

«Оларды сыртқа емес, ішке орнатады. Санкциялар әкімшілік кодексте белгіленген. Қаулы тек талаптарды белгілейді, ал жаза заңмен реттеледі», – деді Ұлттық банк төрағасы.

Бұл – өткеннің сарқыншағы

Ұлттық банк өкілдерінің айтуынша, валюта бағамын көшеде көрсету – заман талабына сай келмейтін тәжірибе. Тимур Сүлейменов мұны «өткеннің сарқыншағы» деп атады.
Сонымен қатар, көше таблолары:

• қалалардың сәулеттік келбетіне зиян келтіреді,
• жол қозғалысы қауіпсіздігіне қауіп төндіреді,
• жарнама ландшафтына кедергі келтіреді.

Валюта айырбастау пункттері не деді?

Ақша айырбастау пункттері бұл өзгеріске қарсы болған. Олар көшедегі таблолар – тұтынушыға қолжетімді ақпарат көзі екенін алға тартқан. Алайда Ұлттық банк бұл талаптан бас тартпай, барлық таблоларды ішке орнатуды міндеттеді.

«Жергілікті филиалдар бақылауды қолға алады. Бұйрықтың орындалуын тексереді», – делінген банк хабарламасында.

Әлемдік тәжірибе қандай?

Кейбір дамыған елдерде валюта бағамдарын ашық жариялау әлі де бар, алайда олар көбіне QR-код, мобильді қосымша немесе банктердің ресми сайттары арқылы беріледі.