Қазақстандық жүргізуші екі айда 131 рет жол ережесін бұзып рекорд орнатты
Фото:Ru.freepik.comАқтөбеде жүргізуші 131 рет жол ережесін бұзып, 3,5 миллион теңге көлемінде айыппұл арқалады. Бұл туралы Stan.kz ақпарат агенттігі “Мой город” порталына сілтеме жасап хабарлайды.
Шетелдік нөмірі бар Toyota көлігінің 27 жастағы жүргізушісі екі айдың ішінде жол қозғалысы ережесін 131 рет бұзып, рекорд орнатты. Салдарынан оған 3,5 миллион теңге көлемінде айыппұл келген.
Жүргізуші жылдамдықты асырып, маневр жасау ережелерін бұзып және жол қозғалысына қатысушылардың өмірі мен денсаулығына қауіп төндіретін басқа да өрескел әрекеттер жасаған. Құқық қорғау органдарының шешімімен көлік айыптұраққа қойылды.
“Жүргізушінің құқық бұзушылықтарының жиілігі мен сипатын ескере отырып, оның әрекеттері адам өліміне алып келіп немесе ауыр жол-көлік оқиғаларына себеп болуы ықтимал еді. Әрбір құқық бұзушылық — адам өміріне қауіп төндіреді", — деп хабарлады облыстық полиция департаменті.
Сондай-ақ полиция азаматтыр жол ережесін сақтап, көлік жүргізгенде аса мұқият болуға шақырды.
