Сталкингке заңмен тосқауыл қойылады – Бас прокуратура
Фото: pixabay.comБас прокурордың орынбасары Әсет Шындалиев сталкинг үшін бөлек баптың не үшін енгізіліп жатқанын түсіндірді, деп хабарлайды BAQ.KZ.
Қазір Қылмыстық кодекске сталкинг бойынша жаңа бап енгізіліп жатыр. Бұл – азаматтың әлеуметтік желіде, көшеде, не болмаса телефон арқылы біреудің соңынан қалмай, мазасын алуы. Мұндай әрекет жүйелі түрде қайталанса, адамның қауіпсіздігіне қатер төндіреді. Тіпті кейіннен аса ауыр қылмысқа ұласуы мүмкін. Сондықтан заңмен жауапкершілік қарастырылып отыр, – деді ол.
Шындалиевтың айтуынша, мұндай әрекет жасаған адам әкімшілік жазаға тартылады немесе 90 күнге дейін қамауға алынуы мүмкін.
Мысалы, бір азамат белгілі бір адамды үнемі аңдып, артынша оған дене жарақатын салса, ол екі бап бойынша – сталкинг және Қылмыстық кодекстің 106-бабы (қасақана ауыр зиян келтіру) бойынша жауапқа тартылады. Бұл бапты теріс пайдалану болмас үшін барлық құқықтық тетік қарастырылған. Тергеуді тергеуші жүргізеді, ал оның заңдылығын прокурор мен сот қадағалайды, – деді Бас прокурордың орынбасары.
Оның сөзінше, жаңа бап құқық қорғау органдары тарапынан терең зерттеліп, нақты дәлелдермен ғана іс қозғалады.
