Каспийге Қызыл кітапқа енген албырт шабақтары жіберілді
Ақтауда каспийлік албырт, яғни, лосось балығының 582 шабағы теңізге жіберілді, деп жазады inbusiness.kz сайты.
Фото: Маңғыстау облыстық балық шаруашылығы басқармасы
Фото: Маңғыстау облыстық балық шаруашылығы басқармасыШабақтар Ақтаудағы заманауи балық өсіру кешенінде өсірілген. Аталған кешен биофильтрация, дезинфекция, оттегімен қанықтыру және су температурасын бақылау жүйелерімен жабдықталған.
"Шараның басты мақсаты — Каспий теңізінде жойылып бара жатқан балық түрлерінің санын қалпына келтіріп, экологиялық тепе-теңдікті сақтау. Салмағы 300 грамнан асқан шабақтардың табиғи ортада тірі қалу мүмкіндігі 20 пайыздан жоғары. Бірақ олар үшін заңсыз балық аулау, жыртқыш балықтар қауіпті", — деді ұйымдастырушылар.
21 мамыр күні теңізге 109 шабақ жіберілген. Жыл соңына дейін жалпы саны 3 мыңнан астам шабақты табиғи ортаға жіберу жоспарлануда.
Каспийлік албырт тек Каспий теңізінде ғана мекендейді. Ол Қазақстанның Қызыл кітабына енгізілген және оны аулауға заң жүзінде қатаң тыйым салынған. Кейінгі жылдары бұл балықтың популяциясы күрт азайған.
