Трамп ЕО тауарларына 50% баж салығын енгізуді кейінге қалдырды
Фото: AP Photo / Evan VucciАҚШ президенті Дональд Трамп Еуропалық Одақ елдерінен келетін тауарларға 50 пайыздық баж салығын енгізу мерзімін 1 маусымнан 2025 жылғы 9 шілдеге ауыстыруға келісті. Бұл туралы ол өзінің Truth Social желісіндегі парақшасында жазды, деп хабарлайды BAQ.KZ.
Трамптың айтуынша, Еурокомиссия төрағасы Урсула фон дер Лейен оған телефон шалып, баж салығын енгізуді кейінге шегеруді сұраған. Әңгіме барысында фон дер Лейен Вашингтон мен Брюссель арасындағы сауда келіссөздерінің таяу арада басталатынына сендірген.
Журналистерге берген жауабында Трамп бұл қоңырауды "өте жағымды" деп атап өтті. Ол сондай-ақ егер еуропалық компаниялар өз өнімдерін АҚШ аумағында өндірсе, онда баж салығын төлеу қажеттілігі болмайтынын еске салды.
Бұған дейін Трамп Еуропалық Одақпен сауда келіссөздерінің күрделі екенін алға тартып, 1 маусымнан бастап ЕО экспортына 50% баж енгізу жоспарын жариялаған болатын. Оның айтуынша, АҚШ пен ЕО арасындағы сауда тапшылығы 250 миллиард долларға жетіп отыр, бұл Америка үшін қолайсыз жағдай. Трамп ЕО-ның құрылу мақсатының бірі — АҚШ-пен саудада артықшылыққа ие болу болғанын да сынға алды.
