Ескі үлгідегі доллар банкноттарын қабылдамау заңды ма? Ұлттық банк жауап берді
1996-2013 жылдары шығарылған доллар банкноттарын екінші деңгейлі банктер мен айырбастау пунктерінің қабылдамағаны туралы шағым жиілеген
Фото: © freepik.comҚазақстан Ұлттық банкі АҚШ долларының ескі үлгідегі банкноттарын айырбастауда туындаған мәселелерге байланысты мәлімдеме жасады, деп хабарлайды Azattyq Rýhy.
Ұлттық банкке 1996-2013 жылдары шығарылған доллар банкноттарын екінші деңгейлі банктер мен банктік емес айырбастау пунктерінің қабылдамауына қатысты азаматтардың шағымдары жиі түсіп жатыр. Ұлттық банк бұл банкноттардың заңды төлем құралы екенін және олардың түпнұсқалығы расталса, бүлінбеген болса, Қазақстан аумағындағы айырбастау пунктерінде еш комиссиясыз қабылдануы тиіс екенін ескертті.
«Банкноттар зақымдалмаған және айналымға жарамды деп танылса, Қазақстан Республикасының заңнамасы шетел валютасының банкноттарын айырбастауда комиссия алуды көздемейді. Тек төлемге жарамсыз немесе айналымға жарамсыз банкноттарды қабылдаған жағдайда ғана комиссия алынуы мүмкін», – делінген мәлімдемеде.
Айырбастау пункті комиссия алса немесе банкноттардың шыққан жылына байланысты айырмашылық енгізсе, сондай-ақ валютаны негізсіз айырбастаудан бас тартса, азаматтар Ұлттық банктің жергілікті филиалдарына шағымдана алады.
«Шағымда айырбастау пунктінің орналасқан жері мен мәселе бойынша толық ақпаратты, сондай-ақ бар құжаттарды қоса тіркеу ұсынылады. Ұлттық банк бұл деректерді заң аясында тиісті шаралар қабылдау үшін қарастырады», — делінген хабарламада.
Ұлттық банк атап өткендей, екінші деңгейлі банктер кассалық операциялар үшін комиссияны өздерінің ішкі тарифтік саясатына сәйкес бекітуге құқылы.
