Елдос Сметов «Жыл дзюдошысы» атағына үміткерлер тізіміне енді
Фото авторы: Сали СабировПариж Олимпиадасының чемпионы Елдос Сметов Халықаралық дзюдо федерациясының (IJF) «Жыл дзюдошысы» атағына үміткерлер қатарына кірді. Бұл туралы Халықаралық дзюдо федерациясы хабарлады.
Федерациясының ресми сайтында 2024 жылдың қорытындысы бойынша бірнеше марапатқа үміткерлерге дауыс беру басталды. Ерлер арасында «Жыл дзюдошысы» атағына ұсынылғандар қатарында Париж Олимпиадасының чемпионы Елдос Сметов те бар.
Сондай-ақ аталған марапатқа Хифуми Абэ (Жапония), Хидаят Гейдаров (Әзербайжан), Лаша Бекаури (Грузия), Таканори Нагасе (Жапония), Зелим Коцоев (Әзербайжан) және Тедди Ринер (Франция) таласып жатыр. Дауыс беру 2025 жылдың 10 қаңтарына дейін жалғасады. Ал жеңімпаздар 2 ақпанда Париждегі Гранд Слэм турнирінде марапатталмақ.
2023 жылы «Жыл дзюдошысы» атағын ерлерден грузиялық Тато Григалашвили, ал әйелдерден жапониялық Ута Абэ жеңіп алған еді.
