Қазақстанда бомбадан қорғанатын орындар бар ма - ТЖМ өкілдері жауап берді
фото: zhukvesti.ruБүгін Төтенше жағдайлар министрлігінде өткен брифингте ведомство өкілдері Қазақстанда бомбадан қорғанатын орындардың бар-жоғын және олардың қандай жағдайда екенін мәлім етті, деп хабарлайды Halyq Uni.
Біздің заңнамада «бомбапана» деген термин қолданылмайды. Оның орнына нормативтік құқықтық актілерде «азаматтық қорғаныстың қорғаныс ғимараты» деген термин қолданылады. Бұрын Кеңес Одағы кезінде халыққа ақпарат берілетін. Ол кезде ел үнемі соғысқа дайын болуы керек және азаматтық қорғаныс мәселесі бойынша бомдадан қорғанатын орындар туралы бәрі білуі керек болатын. Қазір біздегі азаматтық қорғаныс ғимараттары – бұрыннан қалған Кеңес Одағының мұрасы. Бізде бар, сол күйінше сақтап отырмыз. Бірақ олар соғыс уақытында жұмысын жалғастырып жатқан ұйымдарға тиесілі, - деді ТЖМ Азаматтық қорғаныс және әскери бөлімдер комитетінің аға офицері Ерсұлтан Тұрмаханов.
Ол жертөлелерді, жерасты автотұрақтарын және қала инфрақұрылымының басқа да жер астындағы ғимараттарды пайдалануға болатынын айтты.
Азаматтық қорғаныс объектілерінің орналасқан жері мен саны құжаттарға сәйкес «қызметтік мақсатта қолданылады» делінген, санын айта алмаймыз. Ал халық паналай алатын орындардың жалпы саны бүгінде 14 мыңға жуық нысанға жетеді, - деді ТЖМ өкілі.
