Ауыл тұрғындарына АЭС-тің маңыздылығы түсіндірілді
Бүгін АЭС салуды қолдау жөніндегі Қазалы аудандық Халықтық штабы төрағасының орынбасары Талайлы Бөріқұлақов пен штаб мүшесі Нұрғиса Жалғасбаев Көларық ауылдық округінің тұрғындарымен кездесіп, АЭС-тің маңыздылығын талқылады.
«Атом электр станциясында өндірілетін электр энергиясының құны басқа энергия көздерімен салыстырғанда жоғары болмайды, өйткені ондағы отынның бағасы тұрақты және энергия сыйымдылығы жоғары. Сонымен қатар станцияның қызмет ету мерзімі 60 жылды құрайды, оны 80 жылға дейін ұзарту мүмкіндігі бар»,- деді Талайлы Бөріқұлақов.
Азаматтардың денсаулығын, өсімдіктер мен жануарлар дүниесін қорғау – мемлекеттің басым бағыттарының бірі. Сондықтан, халықтың атом электр станцияларына қатысты оң шешімі болған жағдайда Қазақстан осы салада озық технологияларды қолданатын болады. Атап айтқанда еліміз, III және III+ жаңа буынды атом электр станциясын салуды жоспарлап отыр. Бұл жайында штаб мүшесі Нұрғиса Жалғасбаев ауыл тұрғындарына айтып берді.
Ал кездесу соңында ауыл тұрғындары АЭС салуды қолдау бойынша оң пікірлерін айтып, қолдауға ниетті екендіктерін білдірді.
