«Полиция қызметкерлері» пәтерлерді аралап жүр: ІІМ қазақстандықтарға үндеу жасады
Фото: Azattyq Rýhy/Әсет ҚұндақбаевМессенджерлер мен әлеуметтік желілерде құқық қорғау қызметкерлері пәтерлерді аралап, үйдің иелерінен құжаттарды көрсетуін талап етіп, биометриялық деректерді жинап жүргендері туралы хабарламалар таралуда. Осыған байланысты ІІМ мәлімдеме жасады, деп хабарлайды Azattyq Rýhy.
Хабарламада бір топ адамның полиция қызметкерлерінің жалған құжаттарын көрсетіп, пәтерлерді аралап жүргені айтылған. Олар тұрғындардан жеке куәліктерін көрсетуді талап етіп, алдағы халық санағына дайындық ретінде биометриялық деректерін жинап жатқанын айтады.
ІІМ мұндай топтардың жоқ екенін, ал таралған ақпараттың – жалған екенін айтты.
Қазақстандықтарға сақ болып, алаяқтардың айласына ермеу керектігі ескертілген. Олар ұрлық жасайтын болуы мүмкін.
«Бұл ақпарат шындыққа жанаспайды. Әлеуметтік желі пайдаланушыларына БАҚ немесе ақпараттық-коммуникациялық желілер арқылы әдейі жалған ақпарат таратқаны үшін жауапкершілік қарастырылғанын еске саламыз. Тек ресми дереккөздерге сеніңіздер», – деп хабарлады ведомство.
