Тест орталығының техникалық ерекшеліктері пысықталды
Ертең мектеп бітіруші түлектер үшін балғын шақтың алғашқы сынағы Ұлттық бірыңғай тестілеу басталады. 16 мамырдан 5 шілдеге дейін Қазалы ауданы бойынша 1600-ден астам талапкер екі кезең бойынша, яғни қос мүмкіндігін пайдаланып, мектеп қабырғасында алған білімін дәлелдейді. Бүгін аудандық білім бөлімінің басшысы, мемлекеттік комиссия төрағасы Әділхан Жөлекешов пен комиссия мүшелері «U-study» аймақтық тестілеу орталығының материалдық-техникалық дайындығын бақылап қайтты. Сонымен бірге орталық қызметкерлерімен Ұлттық тестілеу барысында балалар кездесуі мүмкін тәуекелдерді барынша азайту, тұла бойы толқынысқа толы талапкерлермен жылы сөйлесу жайында әңгіме өрбітті.
Еске сала кетейік, биыл Арал, Қармақшы ауданындағы жүздеген шәкірт Қазалы ауданынан тест тапсыруға ниеттеніп отыр.
