Ас беруге рұқсат берілді

Мектепке дейінгі мекемелердің жұмысына белгіленген талаптарды орындаған жағдайда ғана рұқсат беріліп отыр. Яғни топтарды біріктіріп іс-шара өткізуге болмайды, ата-аналар мен еріп жүретін адамдардың ғимаратқа кіруіне рұқсат жоқ. Ал жалпы білім ошақтарында мектеп алды және 1-5, халықаралық мектептерде 1-7-сыныптарға оқуға рұқсат. Алайда әр класста оқушы саны 25-тен аспауы керек.

– Қазіргі таңда біздің облыс жасыл аймақта. Сол себепті жаңа қаулыда біздің аймақтағы карантин талаптары жеңілдетіліп жатыр. Бірақ бірқатар шектеулер әлі де жалғасады. Атап айтқанда, ойын-сауық іс-шараларын, көрме, форум, конференцияларды, сондай-ақ отбасылық салтанатты, естелік іс-шараларды (банкет, үйлену тойы, мерейтойлар), оның ішінде үйде және адамдар көп жиналатын өзге де іс-шараларды өткізуге, букмекерлік кеңсенің, балаларды сауықтыру лагерлерінің қызметіне, мерекелік корпоративтерді ұйымдастыру мен өткізуге тыйым салынады, – деді облыстың Бас мемлекеттік санитариялық дәрігері Динара Жаңабергенова.

Тыйым салуларға қарамастан әлі де тәртіп бұзушылықтар орын алуда. Жыл басынан бері мониторингтік топ 1450 нысанға тексеріс жүргізіп, оның 68-і карантин талаптарын бұзғандығы анықталды.