Оған дәлел биыл Қазалы ауданында «Жұмыспен қамтудың 2020-2021 жылдарға арналған жол картасы» мемлекеттік бағдарламасының аясында құны 3 млрд 11 млн 89 мың теңге болатын 42 жоба іске асырылып жатыр. Атап айтар болсақ, мемлекеттік бағдарлама шеңберінде 9 жоба қарастырылған. 1084 адам жұмыспен қамтылып, әлеуметтік нысандар жаңғыртылудан өткізіліп жатыр.

Бағдарлама шеңберінде Ғ.Мұратбаев ауылына табиғи газ тартылып, Майлыбас ауылдық округіне қарасты Ақсуат ауылында 150 орындық клубтың құрылысы аяқталып қалды. Нысанның жалпы құны 230 млн теңгеден асады. Қазіргі кезде құрылыс аяқталуға жақын.

Аудан орталығында 1 қабатты 4 пәтерлі 10 жалдамалы тұрғын үй құрылысы жүріп жатыр. Биыл басталған жобаның құны 431,053 млн теңге. Салынған үйлер құрылысына несие есебінен республикалық бюджеттен 285 млн теңгеден астам қаржы бөлініп, 125 млн теңгесі бүгінде игерілген.

Биыл пайдалануға берілетін Әйтеке би кентінде 600 орындық мәдениет үйінің құрылысы салынуда. Нысанның іргетасы қаланып, кірпіш қалау жұмысы жүргізіліп, төбе шатыры жабылып, терезелері салынды. Ішкі әрлеу және кафель жабыстыру жұмыстары жүргізілді. Мәдениет үйі екі қабаттан тұрады. Ғимаратта 600 орындық көрермендер залы, стол ойындарына арналған бөлме, мерекелік және салт-дәстүрді насихаттау залы, хор бөлмесі, бейнелеу өнері, кітапхана және оқу бөлмелері қарастырылған.

Кентте тағы бір кәсіпкерлік нысан іске қосылды. Ол – сыйымдылығы 500 тоннаға арналған көкөніс, жеміс-жидек сақтау қоймасы. Облыстағы өзге аудандарда жоқ қойманы «АгроОптСервис» ЖШС салған. Аудандағы азық-түлік бағасын тұрақтандыру үшін оң қадам осы. Бұл айтқандарымыз жасалған ауқымды істің бір парасы. Қала мен кент аралығындағы қарқынды еңбек пен жұмыс қызған құрылыс сөзімізге дәлел.