Аудан және ауыл әкімдері есеп берді

Қазалы ауданындағы Қашақбай Пірімов атындағы ауылда аудан және ауыл әкімдерінің есепті кездесуі өтті.

Бұл ауылда кәсіпкерлер қатары көбейген. Яғни, өткен жылы «Бастау-Бизнес» кәсіпкерлік негіздері бойынша барлығы 9 азамат оқуға қатысып, сертификат алған 7-і өздерінің бизнес жобаларын қорғап шыққан. «Ауылшаруашылығын қаржылай қолдау қоры» бір адамды мал бордақылау мақсатында 1,5 млн және наубайхана ашпақ ниеттегі тағы бір тұрғынды 1,4 млн теңгемен қаржыландырған.

Округте бір ауылшаруашылығы кооперативі мен 67 шаруа қожалығы тіркелген. Ауылда мал шаруашылығымен, жолаушы тасмалымен айналысатын бірнеше кәсіпкер бар. Халыққа монша, жеті дүкен қызмет көрсетеді. Ауылдағы ауыз толтырып айтар жаңалықтың бірі – көшелерде метал бағанды жарықшамдар орнатылып, түнгі жарықшамдармен қамтамасыз етілгендігі.

Алдағы уақытта ауыл әкімі Болатбек Баймаханов ауылдың санитарлық-тазалық жұмыстарын одан әрі жақсарту, елді мекендерді көгалдандыру және көшелерді жарықтандыру жұмыстары мен мемлекеттік бағдарламаларды округ тұрғындарына түсіндіре отырып, жеке кәсіпкерлікті дамыту арқылы жұмыссыздықтың деңгейін төмендетуге нақты іс-шаралар атқаруды мақсат етіп қойғандығын атады. Сондай-ақ, жас ұрпаққа рухани-имандылық, адамгершілік, діни сауаттылық бағытында тәрбие беру арқылы дәстүрлі ислам жолымен жүруіне, жастарды мәдени спорт шараларына барынша жұмылдыру, округте салауатты өмір салтын қалыптастыру бағытында да шаралар жүргізілетін болады.

Есепті кездесулерде ауыл ақсақалдары мен тұрғындары өз ой-пікірлерін ортаға салып, жасалып жатқан жұмыстарға оң бағасын берді.