Ынтымақтастық ырысы
"Түркітілдес журналистер" қорының ұйымдастыруымен Түркияның Қазақстандағы Бас консулы Рыза Қаған Йылмаз қазақ журналистерімен кездесіп, екі ел арасындағы ынтымақтастық байланыс төңірегінде әңгіме өрбітті. Бауырлас елдер арасындағы тарихи-мәдени, экономика саласындағы әріптестіктің тарихы терең екенін алға тартты.БАҚ өкілдерімен кездесуде Бас Консул Қазақстан-Түркия арасындағы саяси-экономикалық, дипломатиялық, тарихи және рухани мәселелер жайын тарқатып айтты. Рыза Қаған Йылмаздың айтуынша, Қазақстан Президенті Нұрсұлтан Назарбаев пен Түркия Президенті Реджеп Тайип Ердоғанның бастамасымен екі ел арасындағы сауда айналымы жуық арада 10 миллиард долларға жеткізіледі. Ежелгі Жібек жолын жаңғырту мақсатында қолға алынған «Заманауи Жібек жолы» жобасы мен жуырда ғана іске қосылған Баку-Тбилиси-Карс теміржол торабы экономикалық байланысты нығайта түсері анық. Қазіргі таңда қазақ және түрік инвесторлары мұнай, мал шаруашылығы, азық-түлік, фармацевтика мен экономиканың басқа да салаларда өте белсенді. Түбі бір түркі елдері саяси, мəдени, рухани бағыттағы байланысын Түркі Кеңесі, ТҮРКСОЙ, Түркі Академиясы халықаралық ұйымдар шеңберінде дамытып келеді.
