«Болжамдар белгілі бір жағдайларға сүйеніп жасалатыны белгілі. Сондықтан 2031 жылға дейінгі болжауды жасау барысында бірнеше жағдай ескерілді. Біріншіден, соңғы 15 жылды еліміздегі халықтың өсу қарқыны жаман болған жоқ. Жалпы халықтың орташа жылдық өсімі 1,2-ні құрады. Оған еліміздегі жалпы халықтың табиғи өсімі 2001 жылмен салыстырғанда соңғы кездері 3 есеге дейін өскені әсер етті . Екіншіден, Қазақстан өңірлеріндегі халықтың өсу қарқыны әртүрлі болды. Мысалы, ең жоғары өсім Астана қаласы мен Маңғыстау өңірінде жоғаы болды. Мұндағы халықтың саны 15 жылмен салыстырғанда 2 есеге артты. Оңтүстік аймақтарда да халықтық өсу көрсеткіші жақсы екені байқалды», - деді сарапшы.

Сонымен қатар ол Ресеймен шекаралас аудандардағы халықтың саны азайғанын атап өтті.

«Ресеймен шекералас 5 аймақта халықтың санының қысқаруы байқалып отыр. Сондай-ақ 2012 жылдан бастап, сыртқа кетіп жатқан азаматтарымыздың саны Қазақстанға келіп жатқан азаматтардан басым екені байқалды. Яғни сыртқы миграция айналымы теріс болжамға әкеп соғуда. Салдарынан халқымыздың саны жылына орта есеппен 12-15 мың адамға азайып отыр», - деді Жақсыбек Күлекеев.

Осы орайда сарапшы жоғарыда факторларды ескере келе, 2030 жылы Қазақстан халқының саны қанша болатынын жеткізді.

«Аталған жағдайларды ескере келе, 2030 жылы халықтың саны 20 млн 560 мыңға жетуі мүмкін. Мұнда Солтүстік Қазақстан облысы мен Қостанай облысында бұл кезеңде де халықтың азаюы жалғаса беретінін байқаймыз. Сондай-ақ 2030 жылға дейінгі уақытта Астана мен Шымкент халықының қарқынды өсуі байқалады. Маңғыстау мен Атырау облысында да халық санының өсуі өте жоғары деңгейде болады. Алайда Ресеймен шекаралас аймақтарда халықтың өсуі көңілдегідей болмайды», - деп түйіндеді сөзін Жақсыбек Күлекеев.