Сарбұлақтағы ағайынның тілегі тыңдалды
Бүгін аудан әкімі Мұхтар Оразбаев шалғайдағы Сарбұлақ ауылдық округіне ат басын бұрып, тұрғындардың талап-тілегін тыңдады.Ауыл халқымен дидарласқан аудан басшысы жыл басынан бері ауданда атқарылған жұмыстарды баяндап, алдағы күннің еншісіндегі оң шаруаларды да тілге тиек етті.
Тұрғындар ұсыныс-пікірлерін жеткізуді шабындық жерлерден бастады. Мұнан соң білім ошағының жайынан хабар берді. Сондай-ақ, жеке мәселелерін жеткізген көпшілік, ризашылықтарын да бүгіп қалмады.
Мұхтар Әуесұлы қойылған сауалдарға жеке-жеке тоқталып, тұрғындардың талап-тілегі ескерусіз қалмайтындығын жеткізіп, айтылған ұсыныстарға сәйкес жауапты сала жетекшілеріне тапсырмалар жүктеді.
Мұнан соң жаңа оқу жылына санаулы күндердің қалғанын айтқан аудан басшысы ауылдағы білім ошағының жаңа оқу жылына дайындығын пысықтады.
"ҚАЗАЛЫ" ақпарат
