Жастар баспана алу бойынша тегін кеңес ала алады

Астаналық жастарға қызмет көрсету орталықтары 2021 жылдан бастап жұмыс істейді. Мұнда келген тұрғындарға ақпараттық-консультациялық көмек беріледі. Сондай-ақ, келушілер жастарды қолдауға бағытталған мемлекеттік бағдарламалар туралы ақпарат алуға мүмкіндігі бар.

Қаламызда жастарға қызмет көрсету орталықтары қаланың 4 ауданында бар. Мамандар мемлекеттік тұрғын үй бағдарламалары, жұмысқа орналастыру, жастардың бастамаларын қолдау, волонтерлік қызмет, сондай-ақ бос уақытты тиімді әрі тегін өткізу мәселелері бойынша кеңес береді. Тегін заңгерлік және психологиялық көмек те көрсетеді. Былтыр орталықтарға 10 мыңға жуық жас адам жүгінді,-дейді Жастар саясаты мәселелері басқармасының басшысы Қайрат Қамбаров.

Оның айтуынша, көбінесе жастар үй алу мәселесі бойынша ақпарат сұрайды.

Сонымен қатар бұл орталықта жетім балалар мен ата-анасының қамқорлығынсыз қалған балаларға арналған мекеме түлектерін интернаттан кейінгі сүйемелдеу және бейімдеу жобасы аясында орталық жұмыс істейді. Орталықтағы заңгерлер құқықтық мәселелері бойынша да кеңес береді.

Біз бұған дейін жұмыссыз әрі баспанасыз жастарға қандай 3 мүмкіндік бар екені туралы жазған едік.