Газ айыру қондырғысының құрылысы қалай қаржыландырылады
Сенат депутаттарының сауалына жауап берген Премьер-Министр Әлихан Смайылов Теңіз кен орнында Газ айыру қондырғысын салуға қаражат қайдан тартылуы мүмкін екендігін айтты, деп хабарлайды inform.kz.«Газ айыру қондырғысы Теңіз кен орнының құрғақ газын метан, этан, пропан-бутан фракцияларына бөлуге арналған. Бұл ретте этан «Ұлттық индустриалдық мұнай-химия технопаркі» арнаулы экономикалық аймағында орналасатын, полиэтилен өндіруге арналған болашақ зауыт үшін шикізат болады. Ал метан ТШО газ құбырымен кері жіберіледі. Бүгінгі таңда коммерциялық займның, сонымен қатар халықаралық даму институттарының (Еуразиялық даму банкі, Еуропа қайта құру және даму банкі, Азия даму банкі) қатысуымен қаржы тартудың түрлі нарықтық тетіктері пысықталып жатыр», - деп атап өтеді Үкімет басшысы жауабында.
Бұған дейін «Теңізшевройл» ЖШС-нан Газ айыру қондырғысын салуға жер учаскесін алу үшін жария сервитут белгіленгенін жазған едік.
