Ата заңым – айбарым
Конституция күні – халқымыз үшін ең қастерлі, ең ұлық мереке. Мемлекетіміздің құқықтық негізін айқындаған Ата заңымыздың қабылданғанына биыл 27 жыл толып отыр.Конституция күніне орай Роза Бағланова атындағы мәдениет орталығында «Конституция – азат елдің ар-намысы» атты салтанатты шара өтті.
Салтанатты шарада аудан әкімі Мұхтар Оразбаев сөз сөйлеп, қазалылықтарды мерекемен құттықтады.
– Сіздерді тәуелсіз ел тарихындағы ең басты мерекенің бірі – Қазақстан Республикасының Конституциясы күнімен шын жүректен құттықтаймын!
Конституция – тұрақтылық пен өркендеудің сенімді іргетасы, әрбір азаматтың құқығы мен еркіндігінің кепілі. Құқықтық мемлекет орнатып, әлемнің өркениетті елдерімен жан-жақты экономикалық-саяси тең дәрежеде қарым-қатынас қалыптастыру, ірі реформаларды жүргізу, демократиялық принциптерді құрметтеу бәрі-бәрі Ата Заңымыздың аясында атқарылып жатқан шаруа. Біздің тәуелсіздігіміз бен тұтастығымыздың, тыныштығымыз бен бейбіт тірлігімізді қас қақпай күзетіп тұрған, халқымызға қорған болған Ата Заңымыздың айбыны арта берсін, – деді аудан басшысы.
Мұхтар Әуесұлы мұнан соң ауданымыздың өсіп-өркендеуіне лайықты үлесін қосып жүрген бірқатар қазалылықтарды «Алғыс хаттармен» марапаттады.
Мерекелік шара соңы аудан өнерпаздарының концерттік бағдарламасына ұласып, әсем әннен шашу шашылды.
«ҚАЗАЛЫ» ақпарат
