«Температураның көтерілуінің әлемдік үрдісіне байланысты әлемдегі су тасқыны саны 6% артты. Бүгінгі таңда біздің негізгі міндетіміз - адамдардың құрбан болуына жол бермеу және елді мекендерді су басу қаупін барынша азайту. Біз төтенше жағдайлардың алдын алу және оларды жою іс-шараларының үйлестірушісі ретінде жыл сайын ведомствоаралық комиссияның отырыстарында республикалық және облыстық деңгейлерде, сондай-ақ Үкіметтің, Қауіпсіздік Кеңесінің отырыстарында су тасқынына дайындық мәселелерін қараймыз. Аумақтарды қорғау жөніндегі іс-шараларды ұйымдастыру жергілікті атқарушы органдардың құзыретіне жататынын атап өткім келеді. Су тасқынына қарсы іс-шаралар өңірлерді дамыту жоспарлы құжатында көзделеді. 2017 жылдан бастап Төтенше жағдайлар министрлігі әзірлейтін су тасқынына қарсы іс-шаралардың жол картасын іске асыру тиімділігін көрсетіп отыр, еліміз бойынша су тасқыны қаупі бар 1 010 елді мекен қамтылды», - деді Ю. Ильин. Оның айтуынша, өзен жағалауын нығайту, арналарын, каналдар мен арықтарды тазарту, қорғаныш бөгендері мен гидротехникалық құрылыстарды салу және жөндеу, жергілікті құлақтандыру жүйелерін орнату шаралары су басу қаупін кезең-кезеңімен азайтуға мүмкіндік берді. «Мәселен, 180 мыңнан астам халқы бар 340 елді мекенге қатысты (33,6%) қауіп-қатер жойылды және 231 мыңнан астам халқы бар 385 (38,1%) елді мекенен қауіп-қатер барынша азайтылды. 285 елді мекен (431 мыңнан астам халқы бар) үшін су басудың ықтимал қаупі сақталуда, олардың 132-сі бұрын картамен көзделген жоқ (әкімдіктермен қосылмаған). Осыған байланысты әкімдіктермен бірлесіп су тасқыны қаупі бар елді мекендердің тізбесіне түзету енгізу жоспарланып отыр. Ол жаңа қауіпті учаскелермен толықтырылады», - деді министр. Айта кетейік, жақында Батыс Қазақстанда су тасқыны қаупі төнген ауылдан тұрғындар көшірілді. Сонымен қатар биыл сәуірде Ақмола облысының бес ауданында су тасқыны қаупі жойылды.