Молдахмет Қаназ – 80 жаста

Сіз, шығармашылық «Сонарына» із салып, «Ақ тайлағыңызды» жетелеп, «Құм қойнауын» аралап, «Жаңбырлы жазда» «Армандай алыс жағалауларды» жағалап, өмір «Арнасына» түстіңіз де «Қияндағы күн нұрына» көз тастап, Алматыға жол тарттыңыз.

Сапарыңыз сәтті болып, шығамаларыңыз бәйгелерді иеленіп, Сізді қазақ, орыстар ғана емес, грузиндердің, өзбектердің оқығаны, орыс, болгар жазушыларын қазақша сөйлеткеніңіз, даусыңыздың Сыр саңлақтарының «Қайталанбас дауыстар» атты антологиясында сақталуы біз үшін мақтаныш.

Сонау жылдары «Жалында» жалындасаңыз, қазір халқымыздың денсаулығына ден қойған «Денсаулық» журналын басқарып отырсыз.

Бұл еңбектеріңіз елеусіз қалмады. Алашқа әйгілендіңіз (2016 жыл «Алаш» сыйлығы), құрметке бөлендіңіз «Арал, Қазалы аудандарының Құрметті Азаматы, 2017 жыл «Құрмет» орденінің иегері атандыңыз.

Қандай жағдайда болсаңыз да «Жер кіндігі» туған жерді, әруағы жебеген Батыр Бабаны – Жанқожа Нұрмұхаммедұлын жадыңыздан бір сәт шығарған жоқсыз.

Сол толғаныстар «Кек» атты үш актілі тарихи драма, Батыр бабамыздың күрес жолы туралы зерттеу жинақтары, «Ел қорғаны – Ер Жәкем» болып, халықтың қолында жүр.

Әдебиет атты әлемге құштар жандарға жасаған қайыр, қомыңыз сол жандардың есінде.

Осының бәрі Сіздің Мәртебеңізді көтере түсетіні сөзсіз. Алла осы абыройдан айырмас деп тілейміз. Сексеннің сеңгірі құтты болғай!