Оның ішінде құс етіне тәуелділік жоғары. Бұл туралы Мәжіліс депутаты Мейрамбек Төлепберген мәлімдеді. Елде асыл тұқымды құстың болмауы импортқа тәуелділікті арттырып отыр.

«Саланың тиімділігін арттыру үшін ғылыми зерттеу институттарының өзіміздің асыл тұқымды құсты өсіріп шығаруы, технологиялар арқылы құс шаруашылығы саласын дамыту керектігі туралы мәселені депутаттар бірнеше рет көтерген болатын. Алайда бұл мәселе «Қазақстан Республикасының кейбір заңнамалық актілеріне асыл тұқымды мал шаруашылығы мәселелері бойынша өзгерістер мен толықтырулар енгізу туралы» Қазақстан Республикасы Заңының жобасында айтылмаған», - дейді депутат.

Ауыл шаруашылығы министрі Ербол Қарашөкеев құс етін өзге елдерден алдырып отырғанымызды мойындап, мәселені қалай шешетінін түсіндірді.

«Соңғы жылдары құс етіне сұраныстың жоғары екенін түсініп, осы салаға қаражат аударып отырмыз. Былтыр Қазақстан бойынша 7 құс фабрикасын іске қостық. Бұл бізде 70 мың тонна құс етін өндіруге мүмкіндік береді. Бұл салаға 40 млрд теңге инвестиция бағытталды», - дейді министр.